Síður

2/23/2014

Í fullri einlægni

Ég held að það hafi verið hollt fyrir mig að opinbera þessi markmið mín. Finn að ég hef verið meira með hugann við þau að reyna að klára þau. 

Á sama tíma hef ég samt líka verið að velta svona markmiðasetningum fyrir mér. Á maður að setja sér markmið eða á maður bara að gera það sem manni fokking langar til? 

Ég hef svo sem ekki komist að neinni niðurstöðu en það hefur verið ágætt fyrir mig að hafa svona lista því það ýtir við mér. En ég er samt á því að sum markmiðin sem ég setti mér eru bara plain tilgangslaus og það er það sem ég ætla að ræða við ykkur.

Þetta með að taka myndir af 101 hlut sem gleður mig, kræst hvað þetta er tilgangslaust, tilgerðarlegt og eitthvað fleira sem byrjar á til. 

Það eru ekki hlutir sem gleðja mig. Það er fólk, aðstæður og ég sjálf. Það sem gleður mig og heldur mér hamingjusamri er ég sjálf og ég get alveg tekið 101 mynd af mér brosandi en ég veit ekki hversu lengi þið mynduð endast í því.

Það er fínt ef þetta virkar fyrir einhvern en ég komst að því að ég er nokkuð þróuð í þessum málum. Ég horfi í kringum mig og brosi af engri ástæðu, þakklát fyrir það að vera til, þakklát fyrir að búa við svona mikið öryggi og fyrst og fremst þakklát fyrir það sem ég hef áorkað og þann stað sem ég er á í lífinu. 

Því hef ég ákveðið að yfirgefa þetta fáránlega markmið og breyta því í að gerast reglulegur styrktaraðili Barnaspítala Hringsins, er það ekki annars í tísku?

Næst skulum við aðeins ræða þessa umræðu með að ''lifa í núinu'' (oj).

Þangað til næst.
Gleðilega nýja viku.

2/21/2014

Fokking föstudagur!




Ógla mikið góða helgi frá mér og Chaplin, þurfum svo aðeins að ræða þessi markmið þegar ég kem aftur...



2/20/2014

Dagur í lífi...

Fyrstu viðbrögð mín við þessum svokallaða ''drykkjuleik'' á Facebook


Og þegar ég sá að fólk ætlaði virkilega að halda þessu til streitu


Ooooog þegar ég sá að sumir eru farnir að taka umferð 2


Komið gott, gott fólk!

2/19/2014

14 af 101

8. Kósí rigingardagur. Mér finnst fátt betra en þegar veðrið er einmitt svona (eins og það er núna í bænum, óveður) og ég þarf ekki að gera neitt. Ég sef sjaldan betur og er sjaldan jafn róleg. Kveiki stundum á Rainy Mood og jazz tónlist bara til að róa mig. Hérna er búið að splæsa saman rigningarhljóðum og eðal jazz í endalausri 'loopu' þannig að gleðin tekur engan endi! 


9. Gamlar bækur. Ójá, ég er með sérstakt blæti fyrir gömlum bókum. Sú fyrsta var einmitt Odysseifskviða sem sést þarna í bakgrunn hún er rétt rúmlega 100 ára og sú nýjasta er Sögur og Kvæði eftir Einar Ben frá 1897. Það er eitthvað við kaffiblettina, lyktina og söguna sem heillar mig, hversu margir hafa átt þessar bækur? Hvar hafa þær verið og hverjir hafa handleikið þær? Tengir mig fortíðinni, ég er voða hrifin af henni. 


10-12. Kertaljós/góð lykt/vanillulykt. Já þetta er eiginlega allt í þrennu því góð lykt fyrir mér er vanillukertalykt. Þessi stjaki er líka dásemdin ein, hann snýst þegar kveikt er á kerti og mér er alveg sama þó að það hangi hreindýr á honum, hann skal fá að vera upp allan ársins hring!


13. Kósí teppi. Getur ekki átt kósí neitt án kósí teppis, end of discussion!


14. Lush. Af augljósri ástæðu fyrir mér, litríkt, vellyktandi og vegan. Birgi mig alltaf upp í úglöndum, kom eflaust síðast heim með ca. 15 kg af sápu. Worth it!


Ég er að skynja ákveðið þema í þessari færslu alveg óvart, kenni veðrinu um! En þetta gengur líka bara svona fantavel. Er semí búin að velja mér tattoo og hvar, þá er bara að finna hvenær og útfærsluna. Spennó!!

Þangað til næst.
Kósíkveðjur.


2/16/2014

7 af 101

Áfram með smjörið! Það saxast vel á þetta markmið mitt að mynda 101 hlut (breyttist reyndar í fólk og aðstæður en þúst ... whatever).

6. Blóm. Við hjónaleysin höfum nú ekki verið vön að halda neitt sérstaklega upp á 14. febrúar en á föstudaginn ákvað betri helmingurinn að gleðja mig með blómum og það var vel þegið (í þessum töluðu þurfti ég að slökkva á viðtali Gísla Marteins við Sigmund, það er ekki hægt að skrifa um eitthvað svona gleðilegt með eitthvað svona grátlegt og vandræðalegt í eyrunum). Ég hef alltaf haldið því fram að ég sé ekki mikil blómakona, mér finnst erfitt að sjá þau deyja og vil halda í gleðina og lyktina sem þeim fylgir að eilífu (ekkert needy neitt, nei nei) en þau glöddu mig mikið og hafa lifað alla helgina sem gleður mig ennþá meira!



7. Að koma öðrum til að hlæja. Jább, það gleður mig ósegjanlega mikið þegar að eitthvað sem ég geri eða segi fær aðra til að hlæja og líða vel, held að það sé bara akkúrat ekkert óeðlilegt við það. Í dag fórum við með þessa pjakka á Risatónleika Sveppa og Villa og þar var mikið hlegið (á milli þess sem það var beðið um mat en það er annað mál). 



Áttuð þið annars ekki góða helgi? Flott.

Þangað til næst.

2/13/2014

5 af 101

Eitt af því sem ég get alltaf treyst á að veita mér ómælda gleði í þessu lífi eru ský. Ekkert rosalega flókið ég veit, en þegar ég er að eiga slæman dag eða þarf einfaldlega smá 'pickmeup' þá lít ég upp og skoða skýin (svo framarlega sem það er ekki heiðskírt eða myrkur). Frá því að ég man eftir mér hafa ský haft þessi áhrif á mig, ég átti það til að liggja í móunum heima og bara hugsa. 

Ef þú ert eins og ég eða einfaldlega vilt staldra í þessu augnabliki með skýjum þá mæli ég með þessum brilliant TED fyrirlestri um ský og smá bloggi á meðan þú ert að því. 

Þetta er ein besta leiðin til að stoppa og upplifa augnablikið sem ég get ímyndað mér.


Og þá veit alheimurinn af skýjablætinu mínu, þá vitið þið allavega hvað ég er að gera næst þegar þið sjáið mig stopp á miðjum gatnamótum að stara upp í himininn! 

Þangað til næst.

2/12/2014

4 af 101

Jæja, þá er komið að fyrstu myndbirtinginum í þessu markmiði. Það var hægara sagt en gert að finna svona marga hluti, ekki að ég eigi erfitt með að gleðjast heldur er bara erfitt að finna svona hluti undir pressu, það komst heldur ekkert annað að en sumarið, sól, blár himinn, hlýtt loft, grænt gras og miðbæjarhangs. Já ég er orðin frekar örvæntingarfull og sýni þessum klaka enga biðlund.

Allavega, til þess að ég verði ekki allt árið að þessu þá hugsa ég að það sé sniðugt að birta nokkrar myndir í einu. Það vildi svo til að ég átti fullt af þessu sem gleður mig, greinilega mjög meðvituð um þetta svona almennt. En það verður samt misjafnt hvort myndirnar koma úr símanum eða betri vélinni, fer eftir hvað er við hendina og hvað er hentugt. Í kvöld er ég t.d. frekar þreytt, þetta lífshlaup er alveg að fara með mig, þannig að það verða bara símamyndir.

En here goes, fyrstu 4 myndirnar í myndaseríunni '101 hlutir sem gleðja mig' (þetta eru samt ekki allt hlutir, sumt af þessu er fólk sko)

1. Frekna. Þessi hundur hefur verið nánast ekkert nema gleðigjafi frá því að hún hlammaði sér inn í líf mitt. Ég segi nánast af því að það hafa komið tímar þar sem hún gert mann gráhærðan með því að stela matnum manns, borða síðustu konfektmolana sem þú varst búin að geyma, hlamma sér og sínum rúmlega 20 kg ofan á þig eins og hún sé chihuahua og næstum því valda árekstrum með því að gelta í tíma og ótíma í bílferðum. En hún er líka fáránlega blíð, klár og fyndin. Það væri t.d. hægt að helluleggja heilt bílaplan með öllum steinunum sem hún hefur dregið heim úr labbitúrum. En já, ég ætla ekki að fjölyrða meira um þetta fyrirbæri sem kallast Frekna, myndin segir allt.


2. Að bíða eftir því að fara til útlanda. Tilfinningin að labba inn í Leifsstöð, fá sér næringu á 300% álagningu og kaupa sér tímarit sem þú myndir annars ekki gera. Priceless!


3. YogiTea! Ég einfaldlega elska þetta te og kvótin þeirra, þau án gríns gera daginn minn betri, þið fáið tvær myndir því ein er einfaldlega ekki nóg!



One minute of laughing equals one hour of life. 
Awwwwww

4. Fallegt útsýni. Á hverjum degi lít ég út um eldhúsgluggann okkar og dáist að þessu yndislega útsýni sem við höfum, það veitir mér kraft að sjá svona langt. Það er líka eitthvað svo yndislegt við kyrrðina sem ríkir yfir borginni á ákveðnum tímum, það gefur mér orku. 



 Jæja þá er þetta markmið loksins komið af stað. Ég hélt að mér myndi aldrei takast það. Næst á dagskrá er að finna mér tattoo, stað til að setja það á og bíómynd til að sjá ein.

Þangað til næst.

2/11/2014

Uppris og Day Zero

Jæja, þá er maður risin upp frá dauðum, eða svo gott sem. Hef ekki bloggað í tæpt ár og það er ástæða fyrir því. Eftir vegan mars þá var bara einfaldlega ekkert til að tala um. Án djóks! Ég átti mjög erfitt með að finna eitthvað skemmtilegt og áhugavert til að tala um og ákvað því bara að sleppa því.

En svo heppilega vill til fyrir ykkur að ég er komin yfir það að spá hvort viðfangsefnið sé spennandi eða ekki, enter at your own risk, í flestum tilfellum er þetta bara ég að tala um sjálfa mig! 

En nei nei, ég er með fullt af skemmtilegum hugmyndum í pokahorninu og mig vantaði einhversstaðar að fá útrás fyrir það, mundi svo eftir því að ég ætti blogg og bara why not!? 

En málin standa sem sagt þannig að ég er með markmiðalista, svokallaðan lista til að hjálpa mér að muna allt það sem mig langar að gera, misskemmtilegt og stundum eru hugmyndirnar háleitari og skemmtilegri en markmiðið sjálft og þá má alveg breyta, það er allt í lagi.

En sumsé, ég þarf að klára þennan lista fyrir miðbik desembers 2014 og það er bara ekkert svo langt í það, ekki miðað við að ég byrjaði í mars 2012 og mér finnst það hafa verið í gær. Ég á ennþá eftir tæp 50 % af listanum og því af nógu að taka. Mér datt í hug að bloggið gæti verið góð leið til að ýta mér áfram! 

Hér koma þau markmið sem ég þarf að klára

1. Búa til time lapse video
2. Fara til nuddara
3. Sjá 1 íslenskt leikrit (búin að sjá 2, markmiðið var 3)
4. Heimsækja 3 ný lönd/nýja staði (markmiðið var 6, búin með 3)
5. Baka 3 nýjar cupcake tegundir (markmiðið var 10, búin með 7)
6. Smakka 6 nýja kokteila (markmiðið var 15, búin með 9)
7. Lesa 3 bækur (markmiðið var 12, búin með 9)
8. Elda 20 nýjar uppskriftir (markmiðið var 100, búin með 80)
9. Senda flöskuskeyti
10. Fá mér annað tattoo
11. Rækta kryddjurtir
12. Fara ein í bíó (hljómar tussuerfitt)
13. Klára plankaáskorunina
14. Skipuleggja uppskriftirnar mínar
15. Ferðast um Ísland
16. Heimsækja Neskaupstað
17. Lesa Mannkynssöguna
18. Mynda landslag frá sama sjónarhorni yfir 4 mismunandi árstíðir
19. Fara í gegnum heila viku án þess að kaupa neitt
20. Ekki kvarta yfir neinu í viku
21. Finna 101 hlut sem gleður mig og mynda það
22. Fara í keilu með skemmtilegu fólki
23. Fara í gegnum heila viku án þess að nota Facebook
24. Gera 3 ljósmyndaverkefni úr ''bókinni''
25. Segja já við öllu í heila viku
25. Hætta að drekka gos í mánuð

Já þannig að þið sjáið, það verður nóg að gera hjá mér. Nú er komin pressa og þá er bara gogogo! Það er nú þegar komin dagsetning á sum af þessum markmiðum en fyrr en þau eru búin haldast þau þarna inni. Ég mun svo koma með regulegt update og myndir ef við á. 

Ætla t.d. að byrja á því að finna 101 hlut sem gleður mig, so far er ég komin með 43, það er tussuerfitt!

Þangað til næst.
Magga Lú